عاد لينتقم - خفاشيات

لإني مُختلف دايماً الكل بينبذني، صدق اللي قالوا محدش بياخد كل حاجة، الحيوانات طردوني من مملكتهم وقالوا عليا طائر، رغم إني حيوان عادي، ومميز عنهم، بعمل اللي مايقدرش حيوان منهم يعمله، والطيور إتبروا مني لما لقوني بولد مش ببيض.
بقيت لوحدي، لا مُنتمي، اكتأبت، النور بقى بيضايق عيني، بكيت كتير، والضلمة بقت ملاذي.. عشت في الـ Dark sides، بقوا يخافوا مني، كان إحساس لا يُوصف.. بقوا يضربوا بيا المثل في الشبحنة والتخويف.. عاملنا فيها خفاش الليل؟
كنت أسطورة، إتقال عني أكاذيب كتير، لكن كلها كانت في صالحي، بقى ليا هيبة بُعدي عنهم زودها..
إتعمل عني أفلام، بقيت سوبر هيرو.. ورجعت الخرافات تنتشر عني من تاني، البني آدمين، دايما يبوظوا كل حاجة بيتدخلوا فيها..
إتقال عني إني مصاص دماء، رغم إني عادي باكل حشرات، وناموس، وحاجات بتموتهم أصلاً وتجيبلهم المرض..
فيها إيه لما أشرب معلقتين دم سمك ولا حيوانات كل يوم؟ محدش بيختار إحتياجاته الغذائية!
حتى الجميل اللي عملته للبشر، نكروه.. وفضلوا يقولوا عليا مصاص دماء، ومقرف!
ما يعرفوش إن لعابي فيه مواد بتمنع التجلط، وانهم بيستخدموها عشان يمنعوا نوبات القلب، والجلطات؟ جرحوني وقفلوا الأجزخانات..

أنا طول عمري كافي غيري شري.. رغم إني مش شرير والله..
لكن هم اللي بيتعدوا على حقي.. دي وصلت إنهم.. وصلت إنهم بقوا يصطادوا أخواتي، وعيالي ويعملوا عليهم شوربة!
إنت متخيل؟
أنا مش عارف النهاية هتكون إيه، بس لكل فعل رد فعل، وإحنا مش هنسكت، آن الأوان لخفافيش الليل تطلع من جحورها، ويرجع العالم كله يعملنا حساب..