يخلق من الشبه أربعين؟

واحدة صاحبتي عاملة ألبوم للأربعين اللي شبهها.. 

الفكرة عجبتني جدا، حاولت أدوّر على حد شبهي.. 

جوجل بتقدم خدمة أثناء البحث عن الصور بإنها بتسمحلك بتحميل صورة وبعدين تضغط بحث، بيبدأ يجمعلك كل النتايج اللي تشبه الصورة اللي إنت حملتها.. 
عملت كده، ظهرتلي نتايج وفقا لتشابه الألوان، يعني كنت لابسة حجاب أخضر فاتح، وتيشرت أبيض، الصور اللي ظهرت في النتايج كانت كلها صوّر ألوانها أخضر وأبيض.. بغض النظر عن إن ممكن يكون في الصورة عصفور كناري.

قريت شوية عن الموضوع، ودوّرت على أي وسيلة ممكن تساعدني،
لقيت تطبيقات كتيرة مخصصة لده، ومواقع عالمية، فكرتها إنك بتدخل مواصفات وشك
شكل العين، شكل الأنف، استدارة الوجه، وهكذا..
وتزوّد الموقع أو التطبيق بصورة أو اتنين ليك.. وتكتب إيميلك وتستنى.. الخدمة أغلبها بفلوس.
ما كدبتش خبر!
أنا مستعدة ألاقي حد شبهي بأي تمن.. أنا متحمسة للموضوع جدا!
بعد 3 أسابيع، كنت نسيت شوية.. لقيت إيميل..
من موقع اسمه I look like YOU
فتحت الإيميل كان فيه مقدمة وصورة attached
قبل ما تظهر الصورة، كانت المقدمة بتقول: "مبروك، لقد وجدنا شخصا يشبهك، ونسبة التطابق 89%، انظر الصورة المرفقة أدناه"

فتحت الصورة واستنيت تحمل.. موبايلي رن..
كان تليفون من الشغل.. كنت قاعدة بتكلم قدام اللاب، وببص على الصورة اللي بتحمل.
الصورة حملت كلها وظهرت، مبقتش عارفة أكمل كلام في الموبايل.. مش عارفة أنطق!
أنا خسرت 5$ عشان موقع نصاب يعدّل صورتي بالفوتوشوب، ويخليها بالأبيض والأسود..
ويضحك عليا.. هيييه لقينا شخص شبهك!
اضايقت! فضلت شوية قدام الصورة، وبعدين حملتها..
رجعت لجوجل وحطيت الصورة في البحث، وبدأت أبحث!
نتائج البحث جابتلي 3 صور أبيض وأسود ليا بشعري!!!
أوك! ده هزار بايخ!!
فضلت أدور هنا وهناك لحد ما لقيت أكونت على فيس بوك، آلان دينوف شاب تلاتيني فرنسي كاتب تحت صورة من الصور بالفرنسية..
"بريدجيت دينوف، جدتي، في شبابها، نحن نفتقدك أيتها الجميلة"
أوك، دي مش أنا! .. بس دي واحدة شبهي لدرجة إنها خدعتني!
بعتله رسالة، بالإنجليزية واستنيت الرد، بعد يومين رد عليا،
مكانش فاهم أي حاجة من رسالتي،
لحسن الحظ كنا احنا الاتنين فاتحين في نفس الوقت.. بعتله الصورة اللي الموقع بعتهالي،
ونسبة التطابق بيني وبين جدته!
كل اللي كنت عاوزاه إني أعرف أكتر عنها..
كان مذهول تماما.. بس لما شاف صورة أكونت بتاعي اقتنع!
قالي إن جدته ماتت، كانت سيدة جميلة، بتحب القراءة والكتب، والحكايات -تقريبا نفس اهتماماتي-
توفت وهو صغير، بس لسه فاكرها بوضوح..
سألته توفت امتى؟
قالّي سنة 1993
.. 1993 .. لما أنا اتولدت!
الموضوع بدأ يبقى أغرب!
طلبت منه صورة ليها لما كانت أكبر، وبعتلي صورتها.. كان احساس غريب!!
حاسّة إني ببص لنفسي بعد سنين..
كان ميعاد شغلي جه..
اضطريت أقفل ورحت الشغل، كنت مبسوطة وكل ما أقابل حد أقوله! ومحدش كان مصدق إن دي واحدة تانية تماما!!

بعد الشغل روحت لقيت رسالة من آلان،
قالي:
أنا لاحظت إن ليكي صور مع حيوانك الأليف..
وأنا بشوف صور جدتي امبارح في الألبوم بعد كلامنا لقيت دي
بعتلي صورة جدته والقط بتاعها.. اللي كان بعين رمادي، وعين زرقا .. تماما زي القط بتاعي! ..

مكانش مجرد شبه بين وشي ووشها.. أنا وبريدجيت دينوف،
حياتنا كانت هي كمان فيها كتير من التشابه!! 

©أسماء عبد الناصر