جيمي وتومي

أنا الشخص اللي انت بتخاف تمشي من جنبه في الشارع،

الشخص اللي ما تحبش لما تقعد في مطعم شيك جنب الشباك، وتبص على الشارع تلاقيه باصص عليك، وباصصلك في الأكل اللي بتاكله..

أنا الشخص اللي بتخاف على بنتك ومراتك منه..

أنا الديفوه الوحيد في صورة العيلة اللي إنت محتفظ بيها في محفظتك..

فاكرني؟

فاكر لما كان زيي زيك؟ فاكر لما كنت أحسن منك؟

.. طيب، فاكر لما قتلتني؟

أنا نفسي مكنتش فاكر..

بقالي 10 سنين مش فاكر أي حاجة.. بس يظهر القدر ليه خطط وحشية ليك.. فخلاني أفتكر..

..

- ماما أنا بكرهه..

* ما ينفعش تقول كده على أخوك!!

- ده مش أخويا.. مش أخويا

* لا أخوك الكبير، وبيحبك.. ما ينفعش تتعامل معاه ولا تتكلم عليه بالطريقة دي.

- أنا بكرهه، وبكره اليوم اللي فكرتوا تتبنوا فيه ولد.

* تومي!! ما ينفعش تتكلم بالطريقة دي!! أنا آسفة إني معرفتش أعدل بينكم.. أنا دلعتك زيادة.. ممكن تقعد وتهدى؟

تومي.. أنا ووالدك الله يرحمه، فضلنا 7 سنين مش بنخلف.. مشاكلنا كانت بتدمر علاقتنا.. كنا محتاجين لطفل يجمع بينا من تاني..

عشان كده جيمي كان بمثابة أول طفل لينا.. لولاه كان زمان علاقتي بوالدك انتهت من زمان.. إنت جيت بعدها بسنتين..

وجيمي أول حد كان فرحان بيك، انا نفسي تعرف إنه فعلا بيحبك وخايف عليك.. وكونه حازم معاك ده عشان هو أخوك الكبير..

ونصيحته ليك لازم تسمعها عشان هو مكان والدك دلوقتي..

* عارفة..؟ أنا كمان بكرهك..

..

- تومي أخويا كان مُدلل.. عمره ما شافني أخ ليه! يمكن عشان مُتبني؟

مش عارف..

بعد موت أبونا.. ماما بدأت تتعب من استهتار تومي ودلعه..

وأنا مكنتش عارف أساعده ازاي! الفرق بيني وبينه

4 سنين.. وعارف ان مرحلة المراهقة اللي هو بيمر بيها، صعب حد يلجمها..

لازم أسافر عشان أدرس المحاماة في المدينة.. مش مطمن أسيب أمي لوحدها.. مش قادر أعتمد على تومي..

ومش قادر أأجل دراستي أكتر من كده..

أخر يوم ليا هنا يوم عيد ميلاد تومي الـ 18 .. أتمنى إن الهدية اللي جبتهاله تسعده.. أتمنى إنه يشوفني زي ما بشوفه.. أخويا..

..

أنا بكرهه.. بكره وجوده.. بابا قبل ما يموت كان بيحبه أكتر مني.. حتى ماما بتحبه أكتر مني..

جيمي هو العاقل الرزين.. هو المفضل عندهم..

حتى لو مكانش ابنهم أصلا..

أخر يوم ليه هنا لازم يكون يوم ما ينساهوش طول حياته.. لازم يدفع تمن وجوده في حياتنا..

يوم عيد ميلادي هيكون يوم ما يتنسيش.. هوريكم جيمي على حقيقته..

__

- اتفقت مع اصحابي، وماما نعمل مفاجأة لتومي، سحبت فلوس من البنك من حسابنا، وجبتله عربية..

متأكد انه هيكون مبسوط.. وان يمكن الهدية دي تكون خطوة في انه يفهم اني فعلا نفسي يكون سعيد، وكويس..

-------

* اتفقت مع اصحابي، يجيبولي حبوب.. هخليه النهاردة مسخرة الحفلة..

جيمي مع حباية dmt أكيد الليلة دي هتكون تاريخية..

------

- تومي، أنا مسافر على طول بعد الحفلة، مش عاوز أوصيك على أمنا..

* متقلقش يا جيمي. . ما هي أمي أكتر على فكرة!

- تومي عاوزك تكون مسئول!

* ينفع الكلام ده النهاردة! خد اشرب وانبسط.. وسيبك من خلافاتنا النهاردة

- لا ما ينفعش.. عشان هسوق..

* طيب لو قلتلك انك لو شربت ده بس.. ده بس

أوعدك اني بعد الليلة دي هبدأ صفحة جديدة في حياتي.. وصفحة جديدة معاك!

- لو على الكاس ده بس فأنا مستعد يا تومي..

تعالى أوريك الهدية..

* إيه انت دافنها في الجنينة!

- تعاالى

-------

- فاكر؟ فاكر ايه اللي حصل في اليوم ده؟

سيبتني أمشي... دمرتلي حياتي

أنا الشخص اللي انت بتخاف تمشي من جنبه في الشارع،

الشخص اللي ما تحبش لما تقعد في مطعم شيك جنب الشباك، وتبص على الشارع تلاقيه باصص عليك، وباصصلك في الأكل اللي بتاكله..

أنا الشخص اللي بتخاف على بنتك ومراتك منه..

أنا الديفوه الوحيد في صورة العيلة اللي إنت محتفظ بيها في محفظتك..

فاكرني؟

فاكر لما كان زيي زيك؟ فاكر لما كنت أحسن منك؟

.. طيب، فاكر لما قتلتني؟

أنا نفسي مكنتش فاكر..

بقالي 10 سنين مش فاكر أي حاجة.. بس يظهر القدر ليه خطط وحشية ليك.. فخلاني أفتكر..

- يا ترى انت بتعيط عشان كنت فاكرني مُت..؟ ولا عشان اتفاجئت؟ ولا عشان مربوط، وضعيف ومتبهدل كده، والموت بيبصلك في عينيك.. ها.. في عينيك

بتحاول تكون شخص لطيف!

هاهاها تصدق.. نفسي أسمعك بتقول ايه؟ "أخويا" .. بس مش مهم أنا مستمتع بمنظرك أكتر وانت متقيد، ومبتنطقش...

انت عندك عيلة أنا.. معنديش .. مراتك حلوة.. بنتك جميلة..

لكن أنا عندي ايه.. ؟؟

أنا اتنقلت مستشفى في مدينة تانية.. محدش يعرفني فيها.. فقت بعد 20 يوم.. تخيل.. 20 يوم الموت بيزاولني في كل لحظة..

وفي الأخر صحيت وأنا .. مش عارف حتى اسمي ايه!

قضيت أيام من غير أكل..

من غير نوم..

اتسرقت..

حتى هدومي اتسرقت..

أكلت من الزبالة..

لبست هدوم واحد مات في الشارع.. وسرقته

قتلت واحد كان بيحاول يسرقني.. قبل ما يموتني هو..

دخلت مستشفى عشان اتسممت من أكل الزبالة....

بقيت مُشرد..

فاكر أول مرة اتقابلنا فيها؟

محامي شيك.. لابس بدلة.. داخل مطعم شيك.. بيقابل مراته وبنته عشان يتغدى معاهم

كان المفروض دي تكون حياتي أنا.. كان مفروض ده يكون أنا..

كان مفروض دي تكون عيلتي أنا..

أكيد عندك شقة حلوة.. أكيد ما عشتش الحياة زي ما أنا عشتها...

انت سرقت مني كل ده..

وأنا لازم دلوقتي آخده.. لازم آخد كل حاجة..

بس فاكر.. فاكر لما طلعت 5 دولار من محفظتك؟

عشان ترميهوملي؟

الصورة.. الصورة اللي حاططها.. معرفتنيش؟ .. بجد ما عرفتنيش؟ ها؟ ها؟

ما بصتش في وشي؟؟

بس أنا عرفتك..

عرفتك وافتكرت.. افتكرت.. كل حاجة.. كل حاجة فجأة افتكرتها

بقالي 54 يوم بفتكر.. بقالي 54 يوم مستني..

هابي بيرث داي تو يو

عيد ميلاد سعيد.. مضطر أنزل هنا.. بس هشغل العربية.. من مصلحتك انك تفضل سايق..

سهلة.. ايديك على الدريكسيون.. رجلك ع البنزين.. ها؟ مش هعلمك..

لحد ما مفعول الحباية يشتغل..

النهاردة يا تومي.. النهاردة هيبقى يوم تاريخي.. عيد ميلادك ال 28 مش ممكن..هنساه.. بس ميتهيأليش انك هتكون موجود عشان تفتكر..

الوداع يا أخويا..

----------

قبل 10 سنوات..

- جيمي! .. بتهزر!

* انت أخويا.. مفيش حاجة تغلى عليك!

- دي أحلى هدية جاتلي في حياتي!!

* مبسوط انها عجبتك.. أنا لازم أمشي دلوقتي..

- جيم .. امم

* ايه؟

- أنا آسف!

* على ايه؟

- مفيش..

---

خرج تومي بالعربية مع أصدقائه الثلاثة.. لديهم مخزون كاف من الحبوب المخدرة والمشروبات المُسكِرة..

تحدوه للذهاب في جولة الى المدينة.. التي تبعد 3 ساعات بالسيارة..

خرج تومي إلى المدينة.. ولم يعد أبدا..

بينما أحس جيمي بتوعك شديد، فأجل سفره إلى المدينة... وظل نائما بغرفته..

____

الآن

* تم الابلاغ عن وجود حادث سير،

شخص مُقيد بمقود السيارة، لازال على قيد الحياة، لكن اصابته بالغة..

تم اثبات هوية الشخص المُصاب.. جيمي آندرسون البالغ من العمُر 32 عام..

-تمت-

 ©أسماء عبد الناصر

*التفسير في التعليق